Page 1 of 1

মানু কিদিয়া লেহাউশপাৎ লাল্লাম ইতারাতা

PostPosted: Fri Dec 09, 2011 11:58 pm
by kungo thang
শুভাশিস সিনহা সাহিত্যৎ কাৎকরা ঠই আগ। এ কনাক বয়সেই গিরকে বিষ্ণুপ্রিয়া মণিপুরী বারো বাংলা সাহিত্যৎ কবি বারো নাট্যকার আগ হিসাবে লেইচন্দন বারো পদফামসৌ আকেইহান পাসে। এফির গল্পর ফালুহানাতৌ গিরকর পদফাম আহান লেপইল। গিরকর গল্পৎ পেয়ার নানান পরীক্ষা-নিরীক্ষা। ফলহান, বিষ্ণুপ্রিয়া মণিপুরী গল্পৎ য়ৌঅইল নুয়া ভঙ্গি, নুয়া বিষয়। উত্তর-আধুনিক গল্পর হুয়াৎহান বিষ্ণুপ্রিয়া মণিপুরী সাত্যিৎ পইলা পেয়ার শুভাশিসর গল্পৎ। শব্দবিন্যাস, বাক্যবিন্যাস বারো চিত্রকল্প রচনা গিরকর কবিতার সাদানে গল্পপাঠকরেও মন্ত্রমুগ্ধ করেসে। বিষ্ণুিপ্রয়া মণিপুরী সংস্কৃতিৎত উপাদান পুলকরিয়া কবিতা, নাটক বারো গল্পর সালেদে শুভাশিসে নিজর ভঙ্গি আহান মূর্তি পালকরানিৎ মেইখ্যু অসে। ঔহানে আমার সাহিত্যরে নুয়া থাক আহানাৎ নিয়া যিতইগা শৈ নেই। যে দশহান গল্প লুরিনানহানল গিথিয়া মালাডাল হংকরেসে ঔ গল্প উতা পাকরিয়া হারপেয়ার, নিছক স্বপ্নবিলাসী রোমান্টিক গল্পকার আগর সাদে অঙ্পা প্রেমকাহিনি বানেয়া ত্বরাক’ জনপ্রিয় অনার পথগদে কাকেই না কারেসে। গিরকর কোন কোন গল্পৎ পেয়ার আযৌন প্রেম-প্রণয় কল্পনার আধোভাষ যেহান আমার কথাসাহিত্যৎ নুয়া মাত্রা আহান যোগ করেসে।

তথাকথিত আধুনিকতা বা বিশ্বায়নর হুতগৎ পড়িয়া মণিপুরীর স্বতন্ত্রতা মাংকরানির যন্ত্রণা মেয়েক শেঙয়া ফঙসে তার গল্পৎ। গল্প এতা পাকরতে পাকরতে পাঠকে তঙাল জগত আহানাৎ ফৌয়ইতারাগা। গল্পগ্রন্থ এহান পাঠকসমাদৃত ইতই আশা করিয়ার।


মানু কিদিয়া লেহাউশপাৎ লাল্লাম ইতারাতা / শুভাশিস সিনহা
প্রকাশক: পৌরি পাবলিকেশন্স
প্রচ্ছদ: শক্তিকুমার সিংহ
দাম: রূপা ১০০ হান